ABOLE SOBEDE NUM BOIE DE MASCRA NA ÉDEN – PARK ONES 1961/62

7/04/2012 08:08 - Modificado em 7/04/2012 08:08
| Comentários fechados em ABOLE SOBEDE NUM BOIE DE MASCRA NA ÉDEN – PARK ONES 1961/62

Certe que dia 21 de Fevrer 2012, foi más um dia de Carnaval na nôs terra de pobreza, bem passode c’tude sê riqueza e morabeza dum pove, qu’um vez pa one, na força colective de sê explendor, sempre ta procurá dá quel “best” pa demonstrá sê amdjor talente na desfile e presentaçon de sês mascra, pal nunca ser igualode ô ultrapassode na sê Carnaval d’Intintaçon, lá na sê Tapadinha de sodade. Más um dia d’Intrude betode pa trás, ma moda voz de pove ta custumá dzê, recordá ê vivê.

E enton, ulim li pam bem fazê bsote fecá ta sabê quem nunca sube e lembrá, quem tava lá naquel note de boie de sobede de Carnaval na Éden-Park que fecá na história de Soncente, pamode passaja de más um daquês peripécia que tude one tava custumá contecê na mei daquês boie popular de mascra, ric de storia que nunca más tava cabá, em que papel pa escrevês nem ca tava tchegá se gente tivesse de pô tude ês na el.

Era e ê sempre quel tal dia de “Carne…vale”, num vale tude de carre, vivide num “speed” sem proibiçon de nium espece, d’home bestide d’amdjer, amdjer bestide d’home cada um gatchode trás de sê mascra, ta tentá trá amdjor proveite de situaçon, naquês boie de sobede na Éden-Park, tê tchegá quel terça-fera dia maxime de liberdade de tude espece, sabende na funde d’alma c’tristeza ô ligria, cma tude tinha de cabá na quarta-fera.

Asssim,cma tude gente sabê, na tradiçon, Éden- Park sempre custumaba organisá c’antecedencia, quês boie de sobede de carnaval log que calendar tava linhá e pô ta corrê. Uns boie famose, sempre nimode chei de gente sem distinçon de nium espece, quê lá tude gente era “djize same” (just the same- mesma cosa).

Ê de lembrá, quês storia de boie de mascra de morrê d’arri, c’Manin Estrela e sê cunquista forte trás de Caela tude um note, quel mascrinha de curpim tric e trac. Quel storia d’Andrê de Pracinha que tude one bestide d’amdjer era pursiguide pa quês moce nocente que tava tmal p’amdjer e tava pagal, pontche, drops, limonada ma pirolite lá na Saturnine de Bar de Cinema Éden-Park, pa depôs el smiba na femaça e dexaba tude ês pra lá c’ága na boca ta bábá.

Tude ês cosa era depôs linhode, lembrode e contode pa pove na dia siguinte, o que tava pô tude gente de bom humor naquel sabe d’arri prop de nôs terra, naquês reunion de bonc de Pracinha d’Igreja ô deboxe daquel espinhera de Praça Estrela que nunca nô podê esquecê.

Ma dês vez, pa quem ta lembrá cosa foi prop série, tê qu’aquel boie de sobede de Carnaval lassim na Éden-Park que tava custumá bai tê plumanhã manchê, tive de cabá antes d’hora pamode quel brincadera de malta, mute bem dirigide pa Dante Mariano ma Fofona (falecide Fausto Medina), Deus dal cêu, e tonte otes malta que participá na el e tita bem sigui li nês storia.

Moda nha amigue irmon Antonin Medina (Cabrita) que também participá forte na preparaçon daquel paródia contam, cma Albino de Nhô Jaime Brito e malta, sês parte de participaçon foi um “pote” quês robá num note de paródia lá pa Monte Sussegue, qu’el Antonin tive de degolá lá na quintal de sês casa na Olte de S.Nicolau e pô quel sangue trançode c’vinagre pal ca coagulá, tude num balão, ta esperá Dante pa quel boie de sobede d’note de Carnaval na Éden-Park.

Note já tava olte, c’aquel múseca de piston Ti Fefa na clarinete cumpanhode pa Jack Estrilinha ma Morgadin na trompete, Ude ma Ti Goy na bataria e más otes cumpanher d’orquesta, ta roncá olte e forte, tê c’aquel tempe paradin que tava, gente tê tava t’uvi sê son melodiose ta invadi tude conte d’Ilha de Monte Cara de poesia, múseca e sonhe.

Ligode na realidae dês storia que foi fête deboxe dum segrede total, naquel note de sobede de boie na Éden-Park, tava nôs Dante Mariano ma Fausto Medina (Fofona) atores principal, Junzim Medina que forneceba quel pistola d’alarme, quel compraba na Drogaria do Leão, Albino Brito e sê “pote” ma Alcides Brito, Antonin Medina (Cabrita) que matá quel ”pote”, Almindo Duarte e más um ô ote que escapam li na momente e ‘m ta pedis desculpa. Pa tabela, foi figurante tude pessoal que tava na boie d’Éden-Park, más Jorge Onet e pliça de sirvice qu’era Nhô Lela Madera.

Boie ta roncá forte num stile de múseca “pumping sweet”, gente dmunde na mei de pista de dança seguerode ta dançá pa rapequete de múseca lançode pa orquesta um traz d’ote e n’era pa pará, mesme suode cansode pa betá tchuque ninguém tava reclamá o recadá pê de sala, de cansera, tal quel sabura tinha ês tmode conta de lampeda.

Enton, foi lá que na mei daquel delire de Carnaval qu’entrá tude quel malta ma quês dôs cumpade que já tinha tude mute bem cumbinode. Cada um betá mon na sê dama e sei ta dançá quel coladera que tava na moda de : – trá… trá… trá… quê olá gente ta bem…, siguide dum valsa churriada de garrafa na mei de sala pa ganhá preme etc…etc.,

Fofona, na mei de sês volta de dança na sala ma sê dama, tava bem e tude vez el tava ta espancá c’polpa na polpa Dante Mariano ma sê dama que também era de concurse garrafa, moda ta bescá guerra.Tê que Dante chateode corrê na el pa ba dal quel garrotche, tude gente gritá, Dante fazê um “break”, log Fofona puxá pistola (d’alarme que ninguém sabia) e dal dôs tire .

Dante, caíde lá pa tchon c’sê camisa brónc chei de sangue na peite, quê el ratchá log quel balão c’sangue de pote quel tinha por dentre de sê camisa e quês tinha preparode lá na casa d’Olte de S.Nicolau, junte ma Antonin, Junzim Medina, Albino, Alcindo e tude quel malta buzode ma não malcriode que sabia gordá segrede.

Basta, que tude quel pove panhode de curte e de surpresa, quonde ês uvi tire e alvicera cma Fausto Medina (Fofona) tinha cabode de matá Dante Mariano a tire na sala de boie n’Éden-Park. ‘M ta dexá bsote imaginá quel reaçon geral lá dentre de Cinema Éden-Park de tude quês gente tonte na pista de dança, na sala, cma n’assitença que tinha pagode pa oiá boie da lá derriba na frisa ma camarote.

Pum pove pacifeque, nada custumode a ês cosa, moda quel de nossa, impacte d’abole daquel matança, mesme fingide, foi bem grande, quê ninguém sabia nem tava ta esperá.

Múseca pará log, quê grite de gente era demás, Cinema Éden-Park esvasiá de gente na espace duns sigunde, boie cabá log, quê era gente ta saltá ta fugi pa tude banda. Dôs mnina que ca pude corrê, desmaiá log e um dês tê fui pzode pa gente ma ês tude cunsigui safá levode pa rua na broce de pove.

Tê Lúlú Marques, (Deus dal céu) que n’altura tava dirigi Éden-Park, também fui panhode de curte e moda el tchegá dzê cma nunca el pensá cma tal cosa podia um dia contecê na Soncente, inda más lá num lugar de pove moda Éden-Park, c’oiá tonte geraçon de passaja, nascê, criá e morrê.

E, abole cuntinuá, quê Fofona tude na seguimente daquel ação, ta bai ta fugi incontrá pa camin Jorge Onet, fidje de Sr Alfrede Marques prime irmon de Lúlú e dzel quel tava ta bai matá cabeça, quê jal tinha matode Dante Mariano a tire la na cinema.Cosa que pove que tava ta bem pa trás confirmá e Jorge Onet c’tude sê sangue friu sei ta bai trás del pa evital de matá cabeça…

Na Éden-Park, Dante inda fecá la pa tchon, bem Lela Madera pliça de sirvice que tinha one derriba d’one tava custumá fazê quel sirvice lá naquês boie sem nunca ter tide um sô problema pamode el ser mute respeitode pa pove.

Ma quel dia lassim el também ca sabia nem qzê quel tava fazê s’era tentá salvá Dante que tava ta parcel morte e leval pa Spital, ô sei ta persigui Fofona na sê currida d’assassine.

Enton, quonde Éden-Park esvasiá de sê pove, Dante dá um solte da lá de tchon e sei ta corrê na direçon de Praça Nova, bai sentá naquel bonc deboxe de Corette de Múseca, rudiode p’alguns curiose ainda deboxe de choque, quês ca sabia sês tava tchorá ô arri d’ligria d’oiá Dante vive.

Fofona cuntinuá sê currida, c’Jorge Onet sempre trás del, tê quonde nas calmas el explical cmanera que cosa tinha side preparode na base dum brincadera de Carnaval. E, devagraim tude cosa cumeçá t’entrá na orda.

Enton Lela Madera, resolvê prendê Dante, ma Dante rafilon moda el era, perguntal pamode colê razon ô delite quel tinha cumitide pa ser prese? Lela ca sube respondel, Dante argui de bonc, betal linga fora e sei ta bai pa casa cum data de gente trás del.

Quexa ca tive de nium banda, pamode ser Intrude ô festa de Carnaval d’Intintaçon que na funde desculpá tude gente, e cabá quel grupe c’organizá quel folia daquel note que fecá na história era tude membre de familia Éden-Park.

E moda de custume, alvicera daquel “ Crime ” naquel sobede de boie de Carnaval na Éden-Park n’Ilha de Monte Cara, corrê pa tude Ilha de Cab Verd e fui mandode na carta ma na télégrama pa tude banda d’estranger ondê que ta vivê cabverdiane.

E na one siguinte, cma morte de pove, moda ta dzide, n’ê sintide, nôs saudose Éden-Park, abri quel festa d’entrada de Carnaval, cum super boie de sobede de lotaçon esgotode e tude cosa daquel one passode, já completamente esquecide na rancar daquel primer peça de boie na ritme daquel: – Oi tunga…oi tunguinha…sibá…sibá…sibábá… sete e mei…sete e nove…costa na tchon dnher na mon…

———————————————————————————————————

p.s.

Nhas sincer agradecimente a nh’amigue irmon e ex-colega de Liceu Gil Eanes Antonin Medina pa tude ês “dade” fornecide que sirvim pam completá nôs storia de dia dmigue. Quel braçona de

 

Zizim Figuera ( José Figueira, Junior

Os comentários estão fechados.

Publicidades
© 2012 - 2017: Notícias do Norte | Todos os direitos reservados.