Mania de Mnine de Soncente – (Ones 1940/60)

2/06/2012 00:06 - Modificado em 2/06/2012 00:06

Jon Cabral, mnine de Soncente nascide e criode na ága de Maderal, lá na Lombe, um daquês touro de nôs ‘’ring de boxe’’ que fui também bom ijgador de football de Club Sportive Amarante, naquel tempe q’Amarante tive quel bom team que César de Nha Júlia, Nhanduque, César Xante, Xodi, Toi de Dua (Muim), Jack Salema, Olave de Nhô Virice, etc… etc, equipa quel pertencê d’alma e coraçon e nunca bandoná, té dia quel dexá terra pa ba bescasse sê vida na estranger.

 

Bom atleta confirmode, Jon Cabral também fazê parte daquel Grande Escola de Boxe de casa de Nh’Antunin Mercone, pai de Djindjin, lá na Lombe, ondê que saíba só quês boxer bezana, de pese pesode, moda Chête de Nh’Antone d’Ana, Pentchibex, Ledy, Newton Djerê e más alguns bom pese médio, moda Jon Dilô, Bans, John Mascarenhas, Olave de Nho Virice, Djunga de Nuninha, Bronque de Nhô Matijim, Muchim Pulpinha, etc…

 

Sês influença na vida moral sportive de nôs juventude fui mute importante, cum impacte bastante positive pa tude nôs, mode sês manera pure e exemplar de comportá na sociedade daquel época, ondê que ca tinha nem vice nem merrinha de femá, bibê, drogá e más otes purcaria dês munde de hoje em dia, dzide moderne e de liberdade!…

 

Seriedade e orgulhe é que sempre motivá nôs atleta más bedje a praticá e cultivá esse manera de vivê naquel época, só pas manteba quel exemple e pudesse cuntinuá ta passone quel mensaja já recibide d’otes, de manera despercibide sem mute conversa, ma sim pa sês valintia, força e coraja puste na luta de sês vida de sportive, que fazê glória de pove de Soncente e que sempre na cuntinuidade no bescá imitá…

 

É de recordá, quê recordá é vivê, quel grande note de boxe na Verbena (Corte-Tennis de Castilho), chei de pove, em que nôs Jon Cabral, bem treinode, favurite, que tude gente postode na el, lançaba na ring log d’entrada de round um ataque furiose contra quel grande de tude tempe, despôs de Chete de Nh’Antone d’Ana, que fui nôs Newton-Djerê.

 

P’azar, Newton Djerê, num de sês super esquiva durante combate, ingataba cabeça na corda de ring. Log Jon Cabral, num furia de matá, proveitá pa rufenal más de trinta e um soc e, ca panhá nium pa gloria de nôs Djerê, que na storia d’esquiva de cabeça na boxe de Cab Verd nunca tive igual!!!

Enton quês gente, vassalode, na sês delire e espantode c’aquel prueza de Djerê, invadi ring, nem ca dexá jogue de boxe cabá, pa esponte de tude sistência, ês rabatá Newton Djerê da lá derriba de ring, dal vitória e, moda de custume, ês sei quel puste n’andor pa rua de cidade de Mindelo ta gritá Newton Djerê, campião…

 

Era quel época em que tude cosa era fete que paixon e amor. Futebolista tava ijgá pa amor a camisola, assim cma mute dês boxer que tchegá d’infrentá tcheu estranger que tava parcê na nôs terra. Ês tava ba ijgá pa gloria de Soncente ma pove de Cab Verd, num munde diferente desse de hoje em dia ondê que tude cosa é denher!

 

Quonte inglês de Blackpool ca perdeba boxe, naquês ring de nôs Soncente sportive dum vez?! Quonte vapor de guerra, de tcheu Naçon, ca fecaba espantode de ter pirdide Football ma Cricket e otes jogue frente a quês amdjor atleta de nôs terra?!

 

Na Soncente, sempre tive quês momente sportive famose, que fecá gravode pa tude tempe na ‘’história’’ ma na coraçon de nôs pove, que nunca nô podê esquecê nem dexá de mentá, quê té inda ês ta fazê parte de storia de nôs passode e mez pa nôs ‘’nove geraçon’’ podê fecá ta sabê cma na Cab Verd sempre tive bons atleta de grande valor fisique e moral.

 

Cmanera que nô podê esquecê, por exemple, dum grande jogue de football moda aquel contra Göthland, um vapor de guerra sueque, chei de bom ijgador que parceba na Porte Grande de Mindelo, ta bem de manobra de Mar Mediterrâneo, ondê quês tinha side, p’uvi dzê, Campion de Football de tude quês ote Esquadra que tava juntode pra lá na manobra?!

 

Compe de Jogue intchide de pove, bô tava dzê cma tude Soncente em pese tava lá dentre mitide pa basse oiá quel jogue… Inda más que Sueque, metene um goal log na principe de jogue!… Nhas gente, ma na dvera daquel lá nunca no tinha oiode na tchon de Soncente, quê dvera, dvera, ês tinha um bom team. Assim fui um a zere (1×0) na marcador, na primera parte.

 

Sigunda parte, quaz na fim de jogue, c’aquel pove triste e quaz já tude desconsolode, bem parcê nôs Lela de Raul de Mindelense, um daquês grande avançade centre de tude tempe de nôs terra, que isolaba ma quel “Gigante” daquel quipra (keeper) sueque, de dôs metre e quate (2,04 m), em que nôs Lela de Raul na tude sê inteligência, cabecial quel bola pa tchon, na mei de perna… dá fui goooaaal!!!… Daquês imaja que ta fecone eternamente gravode na nôs mimória, ma na nôs coraçon, siguide daquel delire de pove ta saltá pa tude banda naquel Compe de Jogue, de ligria…

 

É de lembrá, tonte raiba c’aquel guarda-redes sueque fecaba, té quel rancá sês cabele de cabeça que mon… Despôs, quonde el calmá, num bnite geste sportive, el ba dá Lela de Raul monzada de parabéns, ta dzel cma goal daquel lá nunca ninguém tinha el mitide, na tude storia de sê vida de football e quel tava levá de nôs terra, Soncente, quel bom souvenir!!!

 

Infelizmente, tude ês mumente de gloria, ondê que Pove de Soncente tava exprimi tude sê Liberdade ma sê Alma, quê ca tinha ote manera na época, bem cumeçá ta caí quonde parceba A.D.B. (Associação Desportiva de Barlavento), chei de sês regra ma lei. Assim, bem dexá de tem quês jogue ranjode, expediente pa rapte, trazide alvicera de borde pa terra pa competiçon, nôs contra ês moda era custume, dode fala pa Nhô Jon Damata, vulgue Damatinha ô José Figueira (Ti Djô Figuera) log quonde ta tinha vapor de Guerra na Porte, ô Carvoer ta descarregá carvon na mei de nôs Baía de Monte Cara…

 

Cosa piorá quonde vapor vrá ta trabaiá a “diesel”, que bem também dexá de ter quês vapor que tava custumá tmá carvon na Baía, pa despôs sigui viaja pa Sul. Carvon c’aquês vapor carvoer tava descarregá, binde de NewCastle (carvon Nhôcasse) ma de Cardiff (carvon Cardiff).

Cma traboi de Porte bem vrá poque, quaz tude ês nôs atleta, tive que sei de terra e bai bescá vida na terra longe, pa garantiba sustente de sês família. Triste sina de nôs pove que embora patriota e amigue de sê terra, vivê empre d’esperança e consolode que sê pobreza… Enton, na mei de tude ês perda de valor sportive, tcheu dês moce de nossa fui obrigode a imbarcá pa estranger…

 

Assim, um moda Jon Cabral tive de bai, primer pa Dakar-Senegal, que fecaba el más na jete e ondê quel vivê uns one lorgue ta trabaiá moda el pudia. Ora de pintor ô caiador de casa, ô enton d’estivador, etc…Enton, bem contecel num daquês dia de sorte, el t’andá lá pa quês cais de porte de Dakar, bem parcê un Vapor Mercone ta pedí marinher pum grande viaja, que nem destine el ca sabia!… Enton, el ba ta corrê dá sê cumpade John de Saninclau, que sempre tinha el ijdode la pa quês terra de Dakar, fala… La ês imbarcá djunte, de marinher naquel grande Tanker Mercone, pronte pa trabaiá no dure, moda que fosse, quê quel vida de terra la pa Dakar, já ca tava grandes cosa.

 

Assim fui sês primer viaja d’imbarcadista na vapor, que destine pa terra longe de  Japon. Despôs dum longue viaja e de ter travessode um data de terra e mar que nunca ês tinha oiode, ês tchegá na Tókio.

 

Log q’aquel tanker de seus tracá na cais, Capton, contente de sês traboi, dás uns dia free pês basse pa terra estrá perna e divirti um csinha. Enton, ês cambá terra cuns dollar na bolse ma sempre djunte pês ca perdeba, quê nunca ês tinha saide pa terra longe, inda más num cidade tão grande assim, sende primer vez quês tava t’incontrá num tal situaçon. Basta pa tude lugar q’um dês tava bai, quel ote tava siguil log sem gaguejá.

 

Es otchá Tókio – Japon sabe pafronta! Que sês truquim na bolse, ês cambá quês três dia pa terra ondê quês fazê tcheu amigue! Vesita e contra vesita pa tude banda de Tókio, ês tive na Casa de Gueixas ondê quês dás quel bonhe d’aga quente revulteode, t’uvi museca, naquel tanquim (jacuzzi). Ma cma ês ca tinha custume daquês cosa lá, quonde quês japonesa fazês ‘’tolabidja’’ e betás na tanque d’aga quente, ês tude gritá na contacte c’aquel aga quente e nôs John de Saninclau vrá pa sê cumpade Jon Cabral, el dzel:

 

–    Iau, cumpade! Conbersa é esse?!  Djoa, quaz ês mnina querê ma bem esfolone vive?!

 

Ma uns minute despôs, ês otchá cosa sabe e ês cumeçá ta gostá. Enton, fui massaja de corpe inter té fartá, que sakê (grogue d’arroz japonês) ta tchuvê té ta betá pa oie, ês num SABURA de matá sem igual, moda ês mez despôs bem contá. Assim, quês três dia passode bem vivide na terra de Japon, ês vrá pa borde, cansode ma feliz e tude contente moda ca pudia dexá de ser, ondê q’ubrigaçon mandás log pa betá mon na traboi.

 

Enton, era traboi pafronta, quês tinha dexode na borde de sês ‘’Tanker Mercone’’ tracode na cais de Tókio, inda más c’aquel calor que pra lá tinha, trançode c’aquel espece de gaita daquel bom Saké, que tinha tmode lugar daquel gruguim de nôs terra, quê pra lá ca tinha ote e fui cosa q’aquês japonesa intchis na butche pra lá, bem intchide!!!… Ês naquel labuta de limpá convês de vapor, deboxe daquel quintura de matá, bem parcês um ‘’CORVE’’ sempre ta voás pa riba de cabeça!… Chatiode que presença daquel animal, quês dôs cumpade já bem fecá prop zarode, quê ‘’CORVE’’ na nôs terra, moda nôs tude sabê, é um posse gorente que sô t’anunciá azar…

 

Inda por cima, cosa que zarás más é q’aquel ‘’CORVE’’, num descontra de matá, moda se nada fosse, sentá, fecá lá ta espiás trabaiá! Enton, cumpade Jon Cabral e John Saninclau, pô log ta esconjural c’aquel:

 

–       Bá sombrá bo mãe, Fi de cadela…

 

Nôs Jon Cabral, mnine de Soncente, pô log ta querê dá pa esperte, el rufená quel CORVE um bassora!… CORVE esquivá bnitim, ma fecá tude sempre sentode lá na sê lugar!… John de Saninclau vrá dzê:

 

–    Bi, cumpade, dja bocê notá cma tem CORVE na tude parte de Munde?! Patchê a mim um pensaba cma CORVE tinha só lá pa nôs terra!?

Enton, Jon Cabral rapte dmunde, pegá, torná rufená CORVE um balde! Mesma cosa! CORVE esquivá, fecá lá tude paradim, sem mexê, pa esponte daquês dôs cumpade, amigue e cumpanher.

Pês consolá sês cabeça, quê jás ca tava ta podê c’aquel BITCHE D’INFERRE, ês dzê cma quel CORVE tava ta dá pa ESPERTE, ma quês dôs juntode tava ta bá mostral regra de bom viver!!!…

 

Ma lá enton é que ‘’loreta sentás pele’’e fui ingone pa pior, quê tudes dôs juntode pa tentá mostrá quel CORVE sês esperteza, pegá rufenal um balde chei d’aga, siguide de tude cosa quês tinha perte de mon, prop pa matá! CORVE, sempre na sê descontra torná esquivá e fecá tranquile sem mexê, tude lá ta espiás…

 

Ês, sem ricurse, completamente desmoralizode e vincide p’aquel animal, inda lançá cumpanher uns palavrinha pa tentá consolá cumpanher de:

 

–   Bom, bom cumpade, ca nô cansá más cabeça q’esse BITCHE lissim, quê esse li é prop esperte!!!…

 

Enton, lá fui esponte geral, quê basta ês ca queriz nem creditá, inda más c’aquel calor na convês de vapor, que sês espece de Saké quês tava, John de Saninclau desisti e largá stora de CORVE damon e cuntinuá sê traboie !!!…

Ma Jon Cabral, c’aquel mania de mnine de Soncente, ta querê dá pa esperte, sempre ta goitá, fecá ta desfarçá té quel torná rufená ‘’CORVE’’ más um caneca baziu que passá reitrunfe dá bai sem tocá na el!!! Enton  lá CORVE reagi e pô ta falá pa ês, e dzês:

 

–    Adèche tcheps ?! Ome, que mi ca bsote boda, quê mi também mi é MNINE DE SONCENTE, HUM ???!!!…

 

 

Zizim Figuera (José Figueira, Júnior)

  1. Amigo de infância Zé Figueira, Como sempre de actualidade com tuas estórias que só podem pertencer ao único e bem nosso mundo humoristico Mindelense São Vicentino Cabo-Verdiano.Só quem não conheceu São Vicente de outrora, não pode avaliar a densidade dessas magnificas “sturinhas do nosso povo” que lá vão reconstituindo o Histórico da nossa bem amada Ilha de S.Vicente de Cabo Verde.A Ilha “LUZ” que bem serviu em grande na formação dos Homens do nosso país Cabo Verde.Parabens e abraço. JoBrito

  2. Amigo de infância Zé Figueira, Como sempre de actualidade com tuas estórias que só podem pertencer ao único e bem nosso mundo humoristico Mindelense São Vicentino Cabo-Verdiano.Só quem não conheceu São Vicente de outrora, não pode avaliar a densidade dessas magnificas “sturinhas do nosso povo” que lá vão reconstituindo o Histórico da nossa bem amada Ilha de S.Vicente de Cabo Verde.A Ilha “LUZ” que bem serviu em grande na formação dos Homens do nosso país Cabo Verde.Parabens e abraço. JoBrito

  3. Zizim, Nha broda um sturinha sabim que nô ta lê sempre c’prazer.Monte Verde també ta fazê parte daquês simbole de estrutura geológica de Soncente.Bnite fotografia que ja matam de sodade daquel frisquim la na TOP na tempe de calor.Braçona Lucas

Os comentários estão fechados.

Publicidades
© 2012 - 2017: Notícias do Norte | Todos os direitos reservados.